Համբուրգի առևտրի պալատում տեղի ունեցած հանդիպման ընթացքում Հայաստանի վարչապետ Նիկոլ Փաշինյանը ներկայացրել է երկրի տնտեսական զարգացման հեռանկարները և ներդրումային հնարավորությունները՝ ընդգծելով օգոստոսի 8-ին Վաշինգտոնում Ադրբեջանի հետ կնքված խաղաղության համաձայնագրի նախաստորագրման կարևորությունը։
Հանդիպմանը, որը նախաձեռնվել էր Համբուրգի առևտրի պալատի կողմից, ներկայացված էին տեղի առաջատար գործարարներ։ Պալատի գլխավոր գործադիր տնօրեն Մալթե Հեյնին նշել է, որ գործարարների շրջանում մեծ հետաքրքրություն է առաջացել Հայաստանում տնտեսության տարբեր ոլորտներում ներդրումներ կատարելու հնարավորությունների նկատմամբ։
Վարչապետ Փաշինյանը իր հերթին նշել է, որ խաղաղության համաձայնագրի նախաստորագրումը նոր հնարավորություններ է բացում երկրի տնտեսության համար՝ ստեղծելով ավելի կայուն և հուսալի միջավայր ներդրումների համար։ Նա նաև անդրադարձել է տարածաշրջանային հաղորդուղիների ապաշրջափակման հնարավորություններին՝ որպես նոր առևտրային ուղիների և տնտեսական համագործակցության զարգացման հեռանկար։
Վարչապետը նաև հավելել է, որ Հայաստանի կառավարությունը շարունակում է իրականացնել համապարփակ բարեփոխումներ՝ ուղղված բիզնես միջավայրի բարելավմանը, տնտեսության տարբեր ճյուղերի զարգացմանը և ներդրումների ներգրավմանը։ Հանդիպման ընթացքում նա պատասխանել է նաև գործարարների կողմից առաջադրված հարցերին՝ մանրամասն ներկայացնելով կառավարության ծրագրերը և տնտեսական քաղաքականությունը։
