Հայաստանը պատրաստ է զարգացնել Ադրբեջանի հետ առևտրային հարաբերությունները՝ ընդգրկելով բոլոր ապրանքատեսակները, ոչ թե կենտրոնանալով միայն նավթամթերքի վրա։ Այս մասին լրագրողների հետ զրույցում հայտարարեց Ազգային ժողովի նախագահ Ալեն Սիմոնյանը։
«Խոսքը վերաբերում է բոլոր տեսակի ապրանքների շրջանառությանը։ Թեև հնարավոր է, որ առաջին քայլը նավթի առաքումն ու ստանալն լինի, մենք պատրաստ ենք աշխատել ավելի լայն ոլորտում»,- նշեց ԱԺ նախագահը՝ օրինակ բերելով ցորենի առաքումը։
Նրա խոսքով՝ շրջանառության մեջ ցորենի հայտնվելը հանգեցրել էր որոշակի շահարկումների, սակայն դրանք հիմնավորված չեն։ «Շահարկումներ էին, որ ցորենը 4-րդ կարգի է և պիտանի չէ։ Ես պետք է ասեմ, որ այդ ցորենն օգտագործվում է նաև հաց թխելու համար»,- պարզաբանեց Ալեն Սիմոնյանը։
Նա ընդգծեց, որ Հայաստանը պետք է օգտվի ապրանքային շուկայի այլընտրանքային տարբերակների առկայությունից՝ ապահովելով, որ Ադրբեջանն էլ կարողանա իր շահերը և հետաքրքրությունները գտնել այդ համագործակցության մեջ։ «Ինչքան շատ այլընտրանք լինի էներգակիրների, Հայաստանը դրանից պետք է օգտվի և հնարավորություն տա, որ դրանից Ադրբեջանն էլ իր շահն ու հետաքրքրությունն ունենա, որպեսզի Հայաստանի տարածքով հնարավորություն ունենա այդ ապրանքն արտահանելու»,- հավելեց նա։
