Այսօր՝ 927 ստորագրությամբ հատուկ նամակով, ԱԺ էին ժամանել 44-օրյա պատերազմում անհետ կորած զինծառայողների հարազատները՝ պահանջելով, որ իրենց տրամադրեն Անդրանիկ Քոչարյանի գլխավորած ԱԺ քննիչ հանձնաժողովի զեկույցը, որը պիտի պարունակի պատերազմի պարտության և կորուստների մեղավորների անունները։
Հարազատները նշում են, որ դիմումը, որը պարունակում է շուրջ հազար ստորագրություն, ԱԺ նախագահին ուղղվել էր դեռևս 2025 թվականի դեկտեմբերի 29-ին։ Չնայած անցած ժամանակին, իրենց պահանջը մինչ օրս չի ստացել պատասխան, ինչը, նրանց խոսքով, արհամարհանք է ցուցաբերում ոչ միայն հարազատների, այլև ամբողջ հայ հանրության նկատմամբ։
«Ամբողջ հայ հանրությունն էլ է արհամարհված, տեղյակ չէ՝ ինչ է իրականում տեղի ունեցել 2020-ի սեպտեմբեր-հոկտեմբեր ամիսներին Արցախում»,— ասել է անհետ կորածի հարազատ Արսեն Ղուկասյանը՝ նշելով, որ իրենք չեն հասկանում, թե ինչու է զեկույցը մինչ օրս գաղտնի պահվում հանրությունից։
Արսեն Ղուկասյանը, որի եղբայրը զոհվել է պատերազմի ընթացքում, իսկ եղբորորդին անհետ կորել, նշել է, որ այժմ ցանկանում է ծանոթանալ զեկույցին՝ հասկանալու համար, արդյո՞ք այն կպատասխանի իրեն և մյուս հարազատների մոտ առաջացած հարցերին։
ԱԺ-ում անցկացված երկուժամյա բողոքի ակցիայի ընթացքում դիմումատուները նշել են, որ նրանց հարկ չի համարել ընդունել ԱԺ նախագահը կամ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը, ով ամբողջությամբ տիրապետում է գաղտնի համարվող զեկույցի բոլոր մանրամասներին։
Վերջում, երբ իրենց պահանջը մեկ անգամ ևս անտեսվեց, հարազատները ստիպված մեկ անգամ ևս կրկնեցին իրենց նամակ-դիմումը՝ ուղարկելով այն ԱԺ նախագահին, ով երկու ամիս շարունակ չի արձագանքել 927 հոգու անունից ստացված պահանջին։ Նրանք նշում են, որ սա արհամարհանք է ծնողների նկատմամբ և պահանջում են հանրությանը տեղեկացնել պատերազմի իրական պատճառների և հետևանքների մասին։
