Հայաստանի Հանրապետության գլխավոր դատախազ Աննա Վարդապետյանի նախաձեռնությամբ տեղի է ունեցել «Հայաստանն ու Եվրաջասթը. ինչպե՞ս փոխգործակցել Եվրաջասթի հետ համագործակցության հարցերով Հայաստանի Հանրապետությունից գործուղված դատախազի հետ» թեմայով կլոր սեղան-քննարկումը: Միջոցառումը կազմակերպվել է Նիդերլանդներում գործող Միջազգային իրավական համագործակցության կենտրոնի հետ համատեղ:
Քննարկման հիմնական նպատակն էր բարձրացնել մասնակիցների իրազեկվածությունը Եվրաջասթի (Եվրոպական միության քրեական արդարադատության ոլորտում համագործակցության գործակալության) և դրա համագործակցության հարցերով դատախազների հիմնական գործառույթների մասին՝ անդրազգային հանցագործությունների դեմ պայքարի համատեքստում: Բացի այդ, քննարկման ընթացքում ներկայացվել են Եվրաջասթի գործիքներին հասանելիություն ստանալու համար աջակցության հայտ ներկայացնելու պայմանները:
Աննա Վարդապետյանը իր խոսքում ընդգծել է, որ Հայաստանի դատախազությունը ձգտում է ամրապնդել միջազգային և տարածաշրջանային մասնագիտական կառույցների հետ համագործակցությունը՝ դատախազի մասնագիտական կարողությունները բարձրացնելու և միջազգային չափորոշիչներին համապատասխանեցնելու նպատակով:
Նա նաև նշել է, որ Հայաստանի և Եվրոպական միության միջև իրավական համագործակցության մասին համաձայնագիրը, որը ստորագրվել է 2024 թվականի ապրիլին, և դրա իրականացման վերաբերյալ աշխատանքային պայմանավորվածությունը, հիմք են ստեղծում 2026 թվականին Հայաստանից դատախազ գործուղելու համար:
Գլխավոր դատախազը շնորհակալություն է հայտնել Նիդերլանդերում գործող Միջազգային իրավական համագործակցության կենտրոնի հետ համագործակցության համար, ինչպես նաև Հայաստանում Նիդերլանդների դեսպանությանն այս նախաձեռնությանը ցուցաբերած աջակցության համար:
Քննարկմանը մասնակցել են նաև Եվրաջասթի Գործընկերների հետ հարաբերությունների հարցերով խորհրդի նախագահ Բոստյան Շկրլեցը, Միջազգային իրավական համագործակցության կենտրոնի Ծրագրի ղեկավար Դոմենիկո Ֆոտինը, Եվրաջասթի ԵՄ-ի և միջազգային հարաբերությունների հարցերով բաժնի իրավախորհրդատու Ֆլորինա Բիսոգը, ինչպես նաև Եվրաջասթի հետ համագործակցության հարցերով Նորվեգիայից և Ուկրաինայից գործուղված դատախազներ:
Միջոցառման ընթացքում Եվրաջասթի հետ համագործակցության հարցերով դատախազների հետ աշխատանքի առանձնահատկությունները և հնարավորությունները ներկայացվել են Նորվեգիայի, Ուկրաինայի և Լատվիայի ներկայացուցիչների կողմից: Կազմակերպիչները նաև ներկայացրել են Եվրաջասթի գործիքակազմից օգտվելու կարգը և վարույթների առնչությամբ օպերատիվ տեղեկատվության փոխանակման պայմանները:
Այս միջոցառումը համարվում է Հայաստանում իրականացվող նախադեպը չունեցող նախաձեռնություն, որը նպատակ ունի ամրապնդել Հայաստանի և Եվրաջասթի միջև ինստիտուցիոնալ հարաբերությունները և խթանել փոխգործակցությունը:
